Колку пати во денот ви се случува да направите мала прошетка до кујната со цел да пронајдете нешто за грицкање? Ако често го правите тоа, значи и вие спаѓате во милионите луѓе низ светот кои уживаат да грицкаат.
И сепак, ако ги запрашате, повеќето од нив ќе го оценат грицкањето како лоша навика. Но, вистината е дека самата навика за грицкање не е штетна ниту за здравјето, ниту за витката линија. За покачувањето на тежината и холестеролот виновна е желбата на луѓето да грицкаат храна која изобилува со масти и калории.
Всушност, повременото грицкање е здраво и полезно за секоја диета. Малата ужина ќе ви помогне да го одржите нивото на енергија, да го намалите чувството на глад и со тоа да го избегнете прејадувањето за време на оброците. Многу подобро е да грицнете нешто пред ручекот, отколку прегладнети да седнете на маса.
Повременото грицкање е здраво и полезно за секоја диета, само треба да го направите вистинскиот избор
Следуваат нашите предлози за совладување на гладот и желбата за мезење без тоа да се одрази на вашата линија и вашето здравје.
Вкусни и здрави мали ужини
- Јаболко со мед и путер од кикирики. Измешајте еднакво количество мед и путер од кикирики. Исечете едно јаболко на полумесечинки и премачкајте ги со тенок слој од приготвената смеса. Наместо јаболко, можете да употребите оризови колачиња.
- Микс од сушено овошје и јаткасти плодови. Измешајте чаша сушени кајсии, ½ чаша сушени боровинки, ½ чаша печени бадеми, ½ чаша семки од сончоглед, 1 чаша кикирики или ореви. Ставете ги сите во кеса и протресете ја за да се измешаат. Поделете ги во 10 мали кесички и ќе имате здрава ужина кога и да посакате.
- Интегрален леб со изварка. Едно парче интегрален леб со микс од зрна премачкајте го со тенок слој изварка. Врз него ставете семки од лен или сончоглед.
- Овошен јогурт. Во чаша јогурт кој содржи мал процент на масти ставете замрзнати или свежи јагоди, боровинки или капинки и малку исечкани бадеми и ореви.
- Портокал со шеќер и цимет. Земете еден портокал и исечете го на 4 тенки кругови. Потоа измешајте 2 супени лажици сок од портокал со 2 лажици сок од лимон, 1 лажица шеќер и ¼ лажица цимет. Со смесата попрскајте ги парчињата портокал. Секое од овие 4 слатки задоволства содржи по 85 калории.
Крцкави грицки до 100 калории
- Замрзнато грозје. Ова е идеално мезе ако сакате да каснете нешто слатко. Секое зрно грозје измијте го одделно и наредете ги на кујнска хартија така што да не се допираат едно со друго. Ставете ги во комората за длабоко замрзнување и откако ќе се замрзнат, соберете ги во кеса и вратете ги повторно во замрзнувачот. Секогаш кога ќе ви се пријаде чоколадо, земете 10 зрна замрзнато грозје и желбата за слатко ќе ви одмине.
- Бејби морковчиња. Изедете 10 бејби моркови и нема да внесете повеќе од 60-70 калории, а додека да ги изгрицкате ќе ви одмине желбата за чипс.
- Пуканки. Консумирајте 3 чаши со пуканки кои се правени без масло или една и пол чаша пуканки со масло.
- Кикирики. Наполнете две супени лажици со кикирики. Така ќе си определите доза којашто нема да ви донесе повеќе од 100 калории, а ќе биде одлична замена кога ќе сакате да јадете смоки.
Дополнителни совети
- Не правете од ужината оброк. Никогаш не треба да имате ужина која содржи повеќе од 150 калории, затоа што тоа всушност е мал оброк. Ужината треба да ви помогне да ја одржите енергијата и да го елиминирате чувството на глад до наредниот оброк, а не да ве најаде.
- Мезете бавно. Исто како и главниот оброк, ужината треба да ја јадете бавно. На мозокот му се потребни 15-20 минути за да ја добие пораката дека сте најадени.
- Никогаш нема да погрешите ако јадете свежо овошје и зеленчук. Повеќето овошни плодови и зеленчуци содржат под 100 калории, па така никогаш нема да направите грешка ако изберете да ја задоволите желбата за грицкање со едно јаболко, портокал, краставица, целер, моркови или брокули.
- Секогаш имајте здрави грицки во кујната. Во малечки кесички чувајте си веќе направен домашен микс од сушено овошје и јаткасти плодови. Во фрижидерот секогаш имајте свежа краставица и мали моркови, а во замрзнувачот – замрзнато грозје. Докажано е дека ако имате на дофат на рака здрави грицки, помалку ќе посегнувате по чипсот или чоколадото.
