Преку плачењето бебињата комуницираат со вас.
Сите бебиња плачат. Дури и ако е потполно здраво, вашето новороденче ќе плаче од 1-3 часа секој ден. Бебињата не се способни да прават ништо сами, па затоа вие треба да му обезбедите сè за да им биде удобно.
Плачењето е начин на комуникација на бебето, за да ви каже дека нешто му е потребно. Еве ги најчестите причини поради кои може да плаче вашето бебенце:
- Чувствува глад. Гладот е најчестата причина, поради која плачат бебињата. Ако изминале 3-4 часа од последниот пат кога бебето доело, плачењето е резултат на гладот. Вашето бебенце веднаш ќе се смири кога ќе го вкуси мајчиното млеко или кога ќе му дадете цуцла.
- Не му е удобно. Бебињата се многу чувствителни ако нивните алишта им се тесни или ако им се водени пелените. На некои не им смета ако им се „полни“ пелените, затоа што им држи топло. Но, некои бебиња едноставно не можат да поднесат водени пелени, особено ако им е иритирана кожата. Проверувајте му ги пелените редовно и веднаш сменете ги ако се водени. Така ќе го спречите плачењето на бебето.
- Сака да го земете во рацете. Ако веќе сте го нахраниле и сте му ги смениле пелените, а вашето бебенце сè уште плаче, најверојатно сака да биде блиску до вас и да го земете во раце. На бебињата многу често им е потребен близок физички контакт, за да се чувствуваат удобно и безбедно.
- Уморно е. Бебињата стануваат многу раздразнителни кога се уморни. Воспоставете рутина. Додека се многу мали новороденчињата треба да спијат на секои 4 часа. Па ако поминало тоа време, однесете го бебето на мирно и тивко место за да спие, дури и ако не изгледа уморно. Во спротивно може да започне да плаче и ќе ви е тешко да го смирите.
- Има колика. Ако вашето бебе плаче регуларно и необјаснливо и тоа плачење трае најмалку три часа дневно, во текот на најмалку 3 дена во неделата, тоа значи дека има колики. Кога има колики бебето силно плаче, има зацрвенето лице и ги свиткува нозете кон стомачето. Нема магичен лек за колики, но оваа појава најчесто не трае подолго од 3 месеци. Навистина е многу иритирачко, но треба да го надминете овој период. Обично кога бебето има колики, ништо не помага за да се смири.