Казухиро Котецу ја освои македонската публика од далечната Јапонија со изведби на наши песни. Неговите видеа наидуваа на бурни аплаузи, а вчера имавме можност да ги чуеме во живо забавните интерпретации.
Јапонскиот оперски солист запеа во рамките на Интернационалниот фестивал на класична музика „Интерфест“ во Битола. Неговиот глас одекна во преполната сала во Центарот за култура и присутните со полни срца го наградуваа за ентузијазамот и талентот со забрзано ракоплескање.
Во придружба на Камерниот оркестар на Битола ⋮IWConnect, под диригентска палка на Владимир Димовски, гостинот од Токио ги нижеше „Македонско девојче“, „Ако умрам ил загинам“, „Ако одам во Битола“...
Видео од изведбата на „Македонско девојче“
На настанот свое обраќање имаше уметничката директорка на Фестивалот Милица Шперовиќ-Рибарски, а меѓу присутните беа јапонскиот амбасадор Оцука Казуја, министерката за култура Бисера Костадиновска-Стојчевска, градоначалникот Тони Коњановски и директорката на Центарот за култура Маја Андоновска Илијевски.
32-рото издание на „Интерфест“ привлече гости од повеќе земји како Шпанија, Италија, Португалија, Украина и Австрија. Фестивалот е поддржан од Министерството за култура и Општина Битола, а спонзори се и г-ѓа Фанија Мемца, бутикот „Ермитаж“ и млекара „Здравје“.
Фотографии: Ивона Кочов / Femina.mk