Свадбата на „заколнатиот ерген“ Џорџ Клуни со адвокатката Амал Аламудин ги привлече погледите на светската јавност кон шармантната Венеција.
Среќниот пар се заколна на вечна љубов во туристичкиот италијански град, а околу 100 блиски гости беа сведоци на приватната церемонија. „Се запознавме во Италија. Имаме дом таму. Знаевме дека таму сакаме и да стапиме во брак“ – рекол Клуни.
Фотографиите од свадбениот албум на Џорџ и Амал ги објавија повеќе познати списанија како „Vanity Fair“, „People“ и „Hello!“, па сите обожаватели на парот можат да го задоволат своето љубопитство и да ѕирнат како течеше свадбата за која сè уште многу се зборува.
Невестинскиот фустан на 36-годишната успешна адвокатка и активистка е дело на Оскар де ла Рента. Венчаницата од француска чипка била декорирана со бисери и блескави камења кои имитирале дијаманти. „Тој е многу елегантен дизајнер и многу елегантен човек“ – рекла Амал за искусниот креатор.
Пред забавата, Амал се пресоблекла во втор фустан. Кратката креација со реси исто така доаѓа од ателјето на Оскар де ла Рента.
Популарниот зет пак му го довери изгледот на својот долгогодишен пријател Џорџо Армани.
Синди Крафорд со сопругот Ренди Гербер, Мет Дејмон, Боно и Ана Винтур беа дел од славните лица кои славеа со младенците.
