Тамара Тодевска со емотивна објава потврди дека ги откажува концертите и потенцира: „Ниту сум била ниту ќе бидам дел од нечии политички игри“
Тамара Тодевска ги откажува закажаните концерти во Охрид и Прилеп. По многубројните критики кои беа упатени кон неа по настапот во Амбасадата на САД во Скопје, кога таа изостави дел од химната, македонската пејачка објави дека нема да настапува во Антички театар во Охрид и на Пивофест во Прилеп.
Во емотивната порака, Тамара сподели дека изминативе денови биле измачување за нејзиното семејство, дека се повлекува од ангажманите за да помогне во смирувањето на ситуацијата која излезе од контрола, а и потенцира дека изоставувањето на стихови од химната била ненамерна грешка и дека никогаш нема да биде дел од политички игри.
Почитувани, очигледната ненамерна грешка при пеењето на химната прерасна во вистински пекол за мене и моето семејство. Со оглед на тоа што не сакам да придонесувам за зголемување на нашата агонија како семејство и во интерес на смирување на целата ситуација која излезе вон контрола, решив да ги откажам концертите во Прилеп и Охрид.
Се надевам дека оваа моја грешка, повторувам грешка, ќе успеете да ја надминете и дека ќе најдете начин да разберете дека е повеќе од ненамерна. Би сакала да се заблагодарам на сите што беа покрај мене во овие тешки мигови. Ниту сум била ниту ќе бидам дел од нечии политички игри, моето семејство е мој број еден приоритет и нивниот мир е на прво место при секој избор.
Со почит, Ваша Тамара