Меган Фокс не остана рамнодушна на обвинувањата дека ги принудува нејзините синови да носат облека за девојчиња. Холивудската ѕвезда возврати на објавата на политичарот Роби Старбак во која беше наведено дека таа ги форсира дечињата да се облекуваат „женски“.
Старбак на Twitter напиша: „Ова се синовите на Меган Фокс. Порано живеевме во исто соседство и децата играа во паркот. Видов две од нив додека беа силно растревожени и велеа дека се принудени од мајка им да носат облека за девојчиња, а нивната дадилка се обидуваше да ги утеши. Тоа е вистинска злоупотреба. Молете се за нив.“
Фокс набрзо ги негираше неговите тврдења и сподели:
„Навистина не сакам да ти го дадам ова внимание, зашто очигледно си гладен за слава. Но, да те подучам нешто...“
„Без оглед на тоа колку очаен си станал за да придобиеш богатство, моќ, успех или слава, никогаш не искористувај деца. Експлоатирањето на идентитетот на моите деца за да свртиш внимание кон твојата политичка кампања те стави на погрешната страна на универзумот. Многупати сум била спалена на клада од несигурни, нарцистични, импотентни мали мажиња како тебе и сепак сум тука. Си поигра со погрешната вештерка“ – дополни таа.
Меган, која е верена со Машин Ган Кели, има три деца со поранешниот сопруг Брајан Остин Грин - Ноа, Боди и Џурни.
