Музички спектакл за душа ја растрепери битолската публика. Синоќа се одржа првиот од двата експресно распродадени концерти „Засекогаш во срцата“, посветени на музичките легенди Тоше Проески и Аки Рахимовски, па во големата сала на Центарот за култура одекнаа хитови кои присутните ги знаеја наизуст.
Македонските ѕвезди од срце и со многу емоции пееја во придружба на Камерниот оркестар на Битола ⋮IWConnect, со кој диригира Владимир Димовски, а со кој покојниот фронтмен на Парни ваљак го имаше еден од своите последни концерти.
Каролина Гочева, Ламбе Алабаковски, Димитар Андоновски, Александра Јанева, Александар Тарабунов, Јана Бурчевска, Виктор Апостоловски, Нико Ѓоргиевски и Бојан Стојков нè понесоа на сентиментално патување низ музиката на двата великани.
Неколку од интерпретациите беа збогатени со гласовите на хорот на Државното музичко училиште од Битола во коешто учеше самиот Тоше.
Александра Јанева со динамичната „Морска ѕвездо“ ја започна хармоничната низа која заврши со „Игри без граници“, „Jesen u meni“ и „Немир“ во изведба на Каролина Гочева.
Се слушаа и „Ангел си ти“ и „За овој свет“ од Ламбе, „Dođi“ и „Има ли ден за нас“ од Тарабунов, „Sve još miriše na nju“ и „ Боже, чувај ја од зло“ од Андоновски, „Цреша“ и „Prokleta Nedjelja“ од Виктор, „Moja Je Pjesma Lagana“ и „Громови на душа“ од Јана, „Who Wants To Live Forever“ и „Љубена“ од Ѓоргиевски, „Is This Love“ и „Ugasi Me“ од Стојков и „Полско цвеќе“ од Јанева.
Камерниот оркестар и хорот на Државното музичко училиште нè потсетија и на меланхоличната „Ариа“ од Тоше и Џана Нанини.
Концертот „Засекогаш во срцата“ се одржува четврта година по ред по иницијатива на директорката на Центарот за култура, Маја Андоновска Илијевски.
