Синоќа, во арената „Борис Трајковски“ ечеше смеа, одекнуваше добра музика, се делеа многу награди и се споменуваа македонски легенди кои нè напуштија во изминатата година. А, повод за тоа беше 27-мото издание на „Златна бубамара на популарноста“.
Покрај Атанас и Тино, оваа година повторно се врати Сашко Коцев за да ја забавува публиката со својот хумор и да се пошегува со актуелните случувања во државата.
Мотото на овогодишното издание беше „Редно е да се има ред“, алудирајќи на фамозната ситуација поврзана во издавањето на нови лични документи.
Коцев се пошегува дека извадил пасош на фората „Само да прашам нешто“, со што измами многу насмевки во големата сала.
Првата награда им беше доделена на децата од „Тин-Камп“, која беше прогласена за Најдобра тинејџерска ТВ Серија. Потоа, следуваше награда за тимот на балетската претстава за деца „Петар Пан“.
Наградата Трајни вредности за афирмација на танцот му беше доделена на Тодор Миладинов. За Трајни вредности во народната музика статуетка доби Нино Величковски, а не беше заборавен и д-р Миодраг Врчаковски, кој исто така доби признание за Трајни вредности.
Постхумна награда за животно дело беше доделена за Кире Костов, кој нè напушти во јуни минатата година.
Од светот на спортот, награди добија Кире Лазаров, кој беше прогласен за Спортска легенда, Игор Стефановски-Иџе, кој беше избран за Спортист на годината, а одбојкарската репрезентација беше наградена за спортискиот успех во изминатата година.
Наградата Најпопуларен спортист заврши во рацете на Никола Ѓоргиев.
Владо Јаневски си замина дома со статуетката за Концерт на годината.
Најзначајните награди ги добија Драган Мијалковски (награда за Животно дело) и Жељко Самарџиќ (награда за Трајни музички вредности).
Легендарните музичари запеаја заедно на сцената.
Наталија Теодосиева заслужено беше прогласена за Актерка на годината, додека наградата за Најпопуларен млад актер заврши во рацете на Сергеј Димовски.
Како и секоја година, во текот на вечерта се издвои време за да се оддаде почит на македонски легенди кои повеќе не се помеѓу нас.
Александар и Дац ја добија наградата за Дуо на годината, а веднаш по нив, Андријана Јаневска се закити со наградата Пејачка на годината.
Статуетката за Албум на годината отиде во рацете на Никола Мицевски за албумот „Македонијо, во срце те носиме“.
Награда за уникатни музички вредности му беше доделена на Рамбо Амадеус.
Последната награда за вечерта беше резервирана за ДНК & Врчак. Тие ја добија статуетката Песна на годината за „Посреќна“.
Листата со сите награди погледнете ја тука.
Фотографии: Александар Буневски / Femina.mk
