Во „Стејплс центарот“ во Лос Анџелес синоќа се одржа 62-рото издание на Греми. На свеченоста беа наградени музичките ѕвезди кои се истакнаа во годината која измина.
Били Ејлиш триумфираше, освојувајќи ги четирите најглавни награди. 18-годишната пејачка е најмладата музичарка и единствената која досега во иста година ги има освоено статуетките во сите категории: Најдобар нов изведувач, Песна на годината, Запис на годината и Албум на годината.
Ејлиш се закити и со статуетка за Најдобар поп вокален албум за „When We All Fall Asleep, Where Do We Go“.
Братот на Били, Финеас О’Конел, беше избран за Продуцент на годината, а заедно добија и уште четири награди.
На Лизо ѝ беа врачени три награди - Најдобра поп соло изведба за „Truth Hurts“, Најдобар урбан албум за „Cuz I Love You“, Најдобра традиционална Р&Б изведба за „Jerome“.
Наградата за Најдобар рок албум заврши кај Cage The Elephant за „Social Cues“, додека за Најдобар денс/електро албум беше избран „No Geography“ на The Chemical Brothers.
Кантри пејачката Тања Такер на 61 година за првпат во својата кариера доби Греми награди. Таа ги освои статуетките за Најдобар кантри албум за „While I’m Livin“, како и за Најдобра кантри песна за „Bring My Flowers Now“.
За Најдобар музички спот беше прогласен видеозаписот за хитот „Old Town Road“.
За Најдобар рап албум беше избран албумот „Igor“ на раперот Тајлер познат под сценското име „The Creator".
Целосната листа на номинирани и добитници на Греми можете да ја погледнете тука.
