Андреа Бочели досега чуваше во тајност дека со членови на неговото семејство биле заразени со коронавирус, но сите ја пребродиле болеста КОВИД-19 без сериозни симптоми.
61-годишниот оперски пејач беше пресретнат од новинари откако со сопругата Вероника донираше крвна плазма во Универзитетската болница во Пиза, а подоцна сподели дека бил дијагностициран уште во март.
„Пандемијата која го потресе светот (слабо) ме засегна мене и членови на моето семејство. Од почит кон оние кај кои вирусот имаше посериозни последици, одлучив дека е најдобро да не ја споделувам таа вест. А и не сакав непотребно да ги алармирам моите фанови и сакав да ја зачувам приватноста на моето семејство.“
„Бевме големи среќници што закрепнавме брзо и лесно на крајот на март. Откако ми беше дадена шанса да донирам крв за да помогнам во пронаоѓањето на лек за КОВИД, мојот одговор веднаш беше ДА. Скромен, но фундаментален гест со кој давам мој мал придонес“ - се вели во неговото соопштение.
Бочели презеде значајна улога во ширењето на свеста за болеста со моќниот концерт во празната катедрала во Милано.
