Кога Викторија Бекам ги правеше првите чекори во модната индустрија, малкумина веруваа дека еден ден таа ќе влезе во кругот на угледни креатори и дека во првиот ред на нејзините ревии ќе седи главната уредничка на „Вог“ Ана Винтур. Но, 39-годишната сопруга на Дејвид Бекам докажа дека заслужува да биде прифатена со почит, освојувајќи ги критичарите со сè позрели и пософистицирани колекции.
На вчерашното модно шоу во рамките на Њујоршката недела на модата, Викторија ја стави под лупата на модните критичари колекцијата есен/зима 2014, а не помина долго време пред да започнат да пристигнуваат и првите коментари.
Судејќи според рецензиите, слободно може да се каже дека ова е најдобрата колекција на Бекам досега.
Едноставните креации со издолжени силуети танцуваат помеѓу мажествениот и женствениот стил на облекување. Монотонијата на едноставните кроеви е разбиена со декорации како набори и златни синџирчиња, како и со плисирани материјали. Црната и белата боја имаат доминантно присуство, а на моменти окото го привлекуваат недефинирани разнобојни шари.
