Ели Сааб ја надополни Париската модна недела со нова модна бајка. Либанскиот дизајнер претстави колекција инспирирана од природата или поточно од цветните градини, за што сведочеа цветните апликации и разиграниот цветен принт.
Како и секогаш, Сааб ја подели ревијата на колоритни блокови – започна со жива розова, премина на бела, продолжи со смарагдно зелена, ја зголеми динамиката со комбинација од бела со цветен микс, си поигра со боја на малина, за да заврши со помрачни цветни комбинации и еднобојни црни креации.
Елеганцијата, која е вкоренета во темелите на модниот бренд, беше зачинета со младешки дух. Миленикот на холивудските ѕвезди и модерните членови на кралските семејства низ светот не беше фокусиран само на долги тоалети достојни за оскаровскиот црвен тепих, па понуди и елегантни панталони и кратки сексапилни фустани.
