Драматични форми, асиметричност, „нов волумен“ инспириран од стилот од 50-тите години, кристален гламур, провокативност, вака накратко би се опишала новата колекција висока мода на Версаче.
Донатела Версаче неочекувано се сврти кон стилот од 50-тите години, поточно кон високата мода на легендарниот дизајнер Чарлс Џејмс, кон неговата љубов кон структурираната естетика и кон неговиот несекојдневен пристап при конструирањето на креациите. „Тој ме наведе да мислам на нови волумени и нова конструкција, но погледнати низ очите на Версаче“ – рекла 59-годишната креаторка. „Ја обожавам високата мода од 50-тите. Според мене, таа беше најсовршена кога станува збор за кројот и конструкцијата“ – објаснила таа.
Корсетираните силуети, високите шлицови, многуте отсечоци и хибридните „фустан-панталони“ кои невоздржано го разголуваа телото се доказ дека Донатела никогаш нема да ја напушти идејата за истакнат сексапил. „Се разбира, никогаш не би го покрила телото целосно“ – коментирала таа.
Клучни детали по кои ќе биде препознатлива колекцијата се двојните ремчиња, кои најчесто стојат на колковите. Елегантните ракавици се уште еден показател за влијанието на модата од 50-тите години во новата рачно изработена колекција. Луксузните ткаенини во одредени моменти се украсени со сваровски кристали со што се засилува гламурозниот ефект.
Ревијата заврши со балски фустани „à la Versace“.
