Ирина Шајк со раскошна креација од Армани и необична „залижана“ фризура на црвениот тепих во Кан

Ирина Шајк го разубави Канскиот фестивал. На премиерата на „Killers Of A Flower Moon“ на престижниот филмски настан, славниот модел позираше со сериозен и заводлив поглед.

37-годишната модна ѕвезда зачекори во елегантна тегет креација, која ја надополни со впечатлив накит од брендот Messika и необична „залижана“ фризура со мокар изглед. Фустанот со длабоко V-деколте и слоевито здолниште доаѓа од модната куќа Џорџо Армани.

На црвениот тепих, Шајк беше придружувана од нејзиниот близок пријател, дизајнерот Рикардо Тиши.

„Killers Of A Flower Moon“ е најновиот филм на Мартин Скорсезе со Леонардо Дикаприо во главната улога. Со оглед на тоа дека прикажувањето беше проследено со 9-минутни стоечки овации, јасно е дека филмот веќе е хит кај филмските критичари.