Синоќа во Њујорк се одржа доделувањето на наградите на Советот на модни дизајнери на Америка (CFDA). Честа да ја понесе значајната награда Модна икона ѝ припадна на Наоми Кембел – жената која уште од крајот на 80-тите години го носи епитетот супермодел.
48-годишната Британка се појави на свечениот настан во црвен фустан со реси од Келвин Клајн и црвени салонки.
Во годините наназад, наградата Модна икона ја имаа добиено Ријана, Бијонсе и Фарел Вилијамс. Минатата година, поранешната уредничка на италијанскиот „Вог“, Франка Созани, постхумно беше прогласена за модна икона.
На црвениот тепих, Наоми позираше со креативниот директор на Келвин Клајн, Раф Симонс, во чии раце заврши наградата за Најдобар дизајнер за женска облека.
