Модната библија „Вог“ за Охрид: „Потполно совршен град исполнет со шармот на Стариот свет“

Пред само два месеци, списанието „Вог“ ја претстави Македонија како гурманска дестинација која секој треба да ја посети. Сега, пофалбите се сконцентрирани на Охрид.

Модната библија го стави Охрид на првото место меѓу шесте „нетуристички“ балкански дестинации кои треба да бидат на врвот на листите за патување во 2017 година.

„Локални жители се шетаат по калдрмата, кајчиња пловат по разбрануваните води, а хор има проба на скалилата на црквата Св. Софија додека паѓа самрак. Добредојдовте во Охрид, Македонија, потполно совршен град исполнет со шармот на Стариот свет, лоциран на брегот на брилијантното Охридско Езеро“ – пишува во текстот во кој се посочени и неколку хотели, ресторани и барови за кои вреди да издвоите пари.

Листата ги вклучува и Призрен (Косово), Трансилванија (Романија), Химара (Албанија) и регионот Херцеговина (Босна и Херцеговина).

Во текстот се намекнува дека овие се сметаат за „нетуристички“ дестинации, бидејќи повеќето од светските патници се одлучуваат за попопуларни дестинации како Хрватска и Црна Гора.

Охрид е и петти најдобар град во светот за 2017 година според Lonely Planet.