Силната поврзаност на малите Риен, Ејнсли и Рајли веќе неколку години го освојува светот.
Храбрите ангелчиња кои на рана возраст го победија ракот се обединија повторно и ја пресоздадоа виралната фотографија, а овој пат ним им се придружи момче кое води тешка борба со леукемија.
На малиот Конор минатата година му била дијагностицирана акутна лимфобластна леукемија. „Тој ќе биде на терапија следните три години, но и покрај тоа, тој е среќен и храбар. Како и девојчињата, тој е вистинска инспирација“ – вели фотографката.
„Да гледаш како девојчињата комуницираат со него беше прекрасно. Тие му ги покажуваа нивните лузни за да го поттикнат да се чувствува покомфорно“ – изјавила мајката на Рајли.
„Сега кога девојчињата се подобри, време е да се погрижиме за оние кои сега ги почнуваат нивните битки. Приклучувањето на Конор во фотографијата помага да ѝ пренесеме на публиката дека допрва треба да ја победиме војната против детскиот рак“ – додала таа.
Фотографката Лора Скантлинг со овие фотографии цели да ја подигне свеста за ракот кај децата.
Првата фотографија од трите девојчиња беше направена пред четири години додека тие беа болни од различни форми на рак. За неа, тие позираа прегрнати и со затворени очи.
Сите следни години слатките другарки позираа со отворени очи и широки насмевки, што ја означува среќната вест за нивната победа над ракот.
Риен за жал секогаш ќе има физички потсетник за болеста. Поради радијацијата, нејзината коса престана да расте, а очите ѝ се подзатворени поради локацијата на туморот во нејзиниот мозок.
Риен денес има 10 години, Ејнсли 8, а Рајли 7 години.