На 30 октомври на телевизија Телма започна да се емитува најновата македонска ТВ серија „Инсајдер“. Сценариото и продукцијата се 100% македонски, што е веднаш забележително поради блискоста на темите, кои можеме да ги гледаме секој работен ден во 20:40.
Инсајдер обработува деликатни теми од актуелната стварост преку случките на редакцијата на истоимениот неделен магазин што се занимава со истражувачко новинарство, во часот пред да се финализираат насловите кои ќе се печатат во новиот број, под притисок на времето и разни надворешни како и внатрешни фактори.
Пресликаната тензија од секојдневната работа на медиумите се нагласува особено во првата епизода со веста дека „Инсајдер“ се затвора. Но, тоа беше само почетокот кој ги исполни очекувањата како на широката јавност, така и на сите присутни на ексклузивната претпремиера на првата епизода, која се одржа неколку дена пред емитувањето на серијата на малите екрани.
„За нас беше навистина тешко кога работевме затоа што знаевме дека на крајот ќе се соочиме со новинарската фела, која е примарната публика што ќе има потреба да се идентификува со она што ние се обидуваме да го создадеме. По првата проекција сум навистина задоволен затоа што реакциите на вашите колеги беа одлични“ - изјави режисерот Игор Иванов – Изи.
Комерцијален текст
