Декември традиционално е месецот кога Pantone ја најавува бојата која ќе ја одбележи следната година.
Овој пат, познатата компанија ја избра Peach Fuzz за боја на 2024 година.
„Во потрага по нијанса што го одразува нашиот вроден копнеж за блискост и поврзаност, избравме боја која зрачи со топлина и модерна елеганција. Нијанса која резонира со сочувство“ – велат од Pantone.
Бојата на годината која ја одредува Pantone има големо влијание не само во модната и козметичката, туку и во сите други гранки на индустријата. Pantone е една од најголемите компании за производство на бои, а позната е по својот систем за стандардизација на боите.
„Peach Fuzz е праска нијанса која носи чувство на нежност и пренесува порака за грижа и споделување, заедница и соработка. Peach Fuzz е подарок за сетилата, која создава симбиотска врска помеѓу нашето сетило за вкус, вид, допир и мирис“ – пишуваат од Pantone на нивниот Instagram профил.
