Мајка сподели колку е убаво да се живее со дете со Даунов синдром во видео кое стана хит на социјалните мрежи.
Видео
Окли Петерсон е мајка на три деца и е креаторка на блогот „Nothing Down About It“, на кој ги споделува своите искуства со слаткото синче Велс за да ја подигне свеста за лицата со Даунов синдром.
Таа вели дека луѓето не можат да разберат како е да се живее со дете со Даунов синдром, како што не можела и таа во минатото, но дека нејзиниот живот е многу поубав поради тригодишниот Велс.
Окли и нејзиниот сопруг немале претстава дека ќе добијат син со ова генетско нарушување и биле многу изненадени и натажени кога ја добиле веста непосредно по породувањето. „Лицето ми беше отечено со денови затоа што бев многу загрижена. Не знаев што да очекувам од неговото здравје. Не знаев што да очекува од неговиот живот и тоа е многу страшно за една мајка. Тоа е страшно за секој родител“ – вели во видеото Петерсон.
Во тие тешки моменти, Окли во болница добила посета од нејзини пријатели кои имаат ќерка со Даунов синдром. „Штотуку ви падна џек пот. Вашето семејство ќе функционира како нормално семејство. Вашето семејство ќе прави прекрасни забавни работи. Всушност, тие ќе бидат уште позабавни поради Велс“ – со овие зборови ја охрабриле тие.
Подоцна, Окли сфатила на што мислеле нејзините пријатели и дека тие биле во право.
„Не сакам луѓето да се чувствуваат лошо поради него. Луѓето не сфаќаат, исто како што не сфаќав јас. Тие ги гледаат нештата кои се тешки, но не гледаат дека Велс ми дава повеќе бакнежи и прегратки од кого било. Велс им го подобрува расположението на луѓето и сака со капацитет кој мислам дека ние не сме способни да го разбереме. Нема ништо лошо во Велс, во неговата дијагноза и во луѓето што живеат живот со Даунов синдром“ – вели таа.
„Велс се восхитува на сè. Тој ужива и ги вкусува сите нешта кои ние не ги забележуваме. Тој умее да цени и да сака на начин на кој ние не можеме. Тој има желба за живот која е толку убава. Посакувам сите да можат да го разберат тоа. Сакам сите да знаат дека ова не е некоја терминална болест. Ова не е некаква ужасна болест. Дауновиот синдром не е трагедија“ – рекла Окли во интервју за People.
Сега, среќната мајка се застапува за своето дете. Таа е негов глас и секојдневно им покажува на луѓето дека животот на Велс е прекрасен.
„Тој ни ги промени животите за да направи нашиот фокус секој ден да биде радоста и среќата и да ги благослови луѓето. Не сакам ни да си замислам свет без уште Велсови. Мислам дека ни требаат уште добрини во нашите животи. Благодарни сме што тој го избра нашето семејство и сакаме да го споделиме со светот“ – додава Петерсон.
Имено, октомври е месец за подигнување на свеста за лицата со Даунов синдром.
