Македонската јавност е потресена со уште една ужасна вест – почина музичарот Андреја Ѓорѓиески – Андреј, како резултат на повредите во пожарот во дискотеката „Пулс“ во Кочани. Имаше 43 години.
Неговите колеги веќе објавуваат пораки за збогум. „Голем човек, големо срце, голема загуба“ - напиша Антониа Гиговска.
Андреј заедно со Владимир Блажев – Панчо повеќе од две децении ја забавуваа публиката и нижеа хит по хит. Тие ја основаа групата ДНК во 2002 година и оттогаш имаат издадено 3 студиски албуми, една „best of“ компилација и едно EP.
Саканиот музичар со сопругата Наталија имаат едно дете – ќеркичката Јана.
Бројот на жртви и повредени во страотниот пожар постојано расте. Официјално е дека починале 59 лица, а над 155 се хоспитализирани.
За жал, струмичанецот Ѓорѓи Горѓиев, тапанарот на ДНК и Александар Ефремов, фотограф на бендот, исто така не преживеаја.
Фото: andrejdnk Instagram