Антонио трча 600 км од Скопје до Острог за болни дечиња во чест на мајка му која почина од рак

Антонио Пандовски има огромно срце.

Хуманиот Македонец пред една недела го започна остварувањето на неговата хумана мисија да истрча 600 километри за да собере средства за дечињата болни од рак кои се лекуваат на Детската Клиника, како и да ја подигне свеста за лицата со попреченост.

Поттикнат од прераната смрт на мајка си и нејзината неостварена желба да го посети Острог, Антонио на 2 јули тргна од пред Соборниот храм во Скопје и цели да стигне до манастирот Острог во Црна Гора. Сите средства собрани преку донации ќе бидат наменети за набавка на неопходна медицинска опрема за најмалите херои.

Зад Пандовски застана Фондацијата „Ице Бегов“ од Гевгелија.

„Иницијативата за оваа мисија е прераната смрт на мојата мајка која боледуваше од канцер на белите дробови. Нејзината преголема желба беше да го посети манастирот Острог, но за жал, не успеа. Сега таа ни е горе ангел на небото и во нејзино име се одлучив за овој хуманитарен подвиг, воедно да помогнам и на нашите најмали пациенти, нашите мали херои. Сакам да им се врати насмевката, да се радуваат, да им покажеме дека има надеж, има човечност и има подобро утро“ – рече тој пред заминувањето.

„Кога ќе видиш еден млад човек како Антонио којшто се одлучил да трча 600 километри за децата што не можат ни до аголот од болничката соба, тогаш сфаќаш дека сè уште има светлина. Ова не е акција само за донации, ова е покана да се потсетиме какви луѓе сакаме да бидеме“ – вели Елена Бегова од Фондацијата.