Почетна » Колумни » Мирисање оригами » Не врти го грбот
Мирисање оригами

Не врти го грбот

Дома ми се препелкаат неколку броеви од списанието Визија.

Ги купив пред неколку месеци на улица, ги продаваа средношколци од Коргачин, така фини и воспитани деца, ентузијастички настроени кон иднината. Немате поим колку пријатно се израдуваа и ми напомнаа дека баш многу им значи тој мал придонес. И јас се израдував и изненадив, искрено, за промена да се видат такви деца и такви содржини на едно место, толку љубов и труд вложено во нешто, мал идиличен свет во кој не владее кич и препич и нескротлива жед за перфорирани мувлосани вредности на денешницата, низ кои протекува нешто скапано.

Бездомник

Деновиве постојано го следам проектот наречен Лице в Лице, со неодолива желба и потреба да се вклучам и да помогнам на каков било начин. Идејата на координаторите поттикна продажба на исклучително квалитетно списание од страна на социјално загрозени и маргинализирани лица, со кои судбината си поиграла безмилосно грда игра. Ова е само мала шанса да излезат како победници во животниот рулет. Всушност, и самото мото вели дека „Со купување на списанието им помагате на многумина. Со неговото читање, си помагате себеси“.

Колкумина сте се сретнале со погледот на бездомник и сте го завртеле настрана, брзо одминувајќи го? Можеби не сте имале време во моментот, а можеби низ главата ви проструила мисла дека е мрзелив, па вашата скромна донација ќе му направи контра-услуга, немотивирајќи го да направи нешто повеќе од обично питање за милостина.

Но, овие храбри луѓе не се питачи. Тие се оние кои и покрај суровите удари решиле цврсто да застанат на своите нозе и да му возвратат на животот со шлаканица. Чисто потсетувајќи го дека – и тие се живи. И имаат право на среќа, топлина, дом.

Луѓето со кои се сретнувате лице в лице, уличните музичари, продавачи.

Тие се достоинствени и чесно се обидуваат да го заработат своето парче леб. Впрочем, како и сите ние, се борат за својот опстанок и едно подобро утре и посреќна иднина.

Не одминувајте ги овие борци. Напротив, да си ги чукнеме главите и да помислиме на кој начин би можеле да помогнеме. Општата ситуацијата е далеку од сјајна и некои денови шеташ со 100 денари во паричникот, но тоа се 100 ден. повеќе отколку што има тој човек кој се исправил и се обидува да заработи.

Има толку многу начини за помош и донации, и не сите опфаќаат исклучиво парични средства. Некои луѓе бараат мебел, други начин како да се стоплат, а трети само малку облека и храна. Верувам дека секој може да одвои барем малку, да се лиши од едно кафе, од ново парче облека или козметика.

И не мора никој да знае за подвигот, освен ние самите. И не се потребни големи памфлети или објави. Доволно е кога ќе легнеш да заспиеш со помислата дека си усреќил некого денеска. Од сосемa несебичен поттик.

Автор: Трендафилка
Дупла скорпија, со две зелени очишта и коса чија боја варира според расположението и временските непогоди.
Мразам луѓе кои доцнат, немиени мрсни коси и турски сапуници.
Добрите книги ги грицкам со глад и не ги зајмувам никому.
Вљубена до ножните прсти.
Неправедно доживувана како разгалено дете единче.

Анкета

Анкета
Дали си имате направено естетска корекција на лицето?
  • 10%
  • 26%
  • 64%
Се испраќа...

(Вкупно: 8905 гласа)

Цитат

Животот е како монета. Можете да ја потрошите како сакате, но можете да ја потрошите САМО ЕДНАШ.

Лилиен Диксон

Виц

Брачните расправии се како да читаш „Правила и услови за користење“ на интернет.

На крајот посекако завршуваш со: „Се согласувам“.