Њујоршката недела на модата заврши. „Ретроманија“ е зборот кој може да ги опише колекциите претставени на ревиите во Њујорк. Повеќето дизајнери гледаа наназад во времето за да ја презентираат својата креативност на иновативен начин и само малку од нив покажаа футуристички стил.
Џејсон Ву
Џејсон Џу претстави креации со силно акцентиран струк и колкови. 28-годишниот дизајнер со вкус си поигра со пропорциите и формите. „Графичкиот контраст на спротивните концепти е силна тема на колекцијата“ – објаснил тој. Употребата на нежно розовата боја беше храбар контраст на неговите бели, црни и сиви креации и монохромните принтови.
Колекцијата во целост беше модерна, скоро минималистичка и романтична, а низ неа се почувствува мало влијание на спортскиот и ретро стилот.
Џени Пекам
Модните ентузијасти со нетрпение очекуваа да видат што ќе претстави британската дизајнерка Џени Пекам поради тоа што Кејт Мидлтон двапати воодушеви со нејзини креации.
Инспирирана од песната „She’s a Rainbow“ на Rolling Stones, Пекман создаде романтична и ултра женствена колекција, полна со ненападни нежни креации.
Каролина Ерера
Брендот Каролина Ерера секогаш се асоцира со елеганција, а не разочара ниту најновата колекција на познатата дизајнерка. Гледајќи ги инвентивните принтови со птици и женствените кројки, не е тешко да се види зошто Ерера е една од омилените креаторки на холивудските убавици.
Луксуз, рафинираност и препознатлив стил можеше да се насети во секоја креација, било да се работи за дневен аутфит со птичји принт или вечерна тоалета со геометриски детали. Од боите може да се каже дека највпечатлива беше комбинацијата црно-бело-црвено.
Оскар де ла Рента
Пред очите на видни модни имиња како Валентино и Рејчел Зое, Оскар де ла Рента претстави разновидна колекција која остави силен впечаток уште од самиот почеток. Де ла Рента шоуто го отвори со три грандиозни креации со огромни здолништа во воочливи бои и со тоа најави дека следува нешто динамично, возбудливо и драматично.
79-годишниот дизајнер, кој зад себе има огромно искуство, настапи бестрашно, користејќи многу различни стилови, текстури и бои за да комплетира фантастични вечерни тоалети што сигурно ќе ги видиме на црвените теписи низ Холивуд и дневни креации за префинетите дами.
Келвин Клајн
Ако не би знаеле кое име стои зад овие креации, тешко дека ќе успееја да ви остават некаков впечаток. Пастелни нијанси на крем, жолто и сребрено и црната боја доминираа во едноставната колекција на Франциско Коста.
Некои од креациите со нежноста и едноставноста дури и наликуваа на ноќници затоа што ја дефинираа формата на целото тело на моделите.
Мајкл Корс
Доволно е да погледнете само неколку модели од новата колекција на Мајкл Корс за да заклучите дека неговата инспирација доаѓа од Африка.
Гладијаторски сандали, змиски и крокодилски чанти, земјени тонови и комфорна облека во сафари стил – тоа беа одликите на колекцијата што Корс би ја опишал со зборот „Африлукс“.
DKNY
И додека Корс црпеше инспирација од егзотичната Африка, Дона Каран инспирацијата ја најде во Америка. Дизајнерката чиј концепт за брендот е изграден околу Њујорк, ја воодушеви публиката со патриотски комбинации на сино, црвено и бело, но исто така можеа да се сретнат и нијанси на розово, црно и крем. „Навистина не постои друго место како нашиот сакан град, Њујорк. Нашата инспирација“ – пишувало во белешките на Каран.
Секој изглед вклучуваше шешир во бои кои апсолутно одговараа на облеката. Преовладуваа едноставни фустани со подолг заден дел, но имаше и тесни пантолони од материјал кој наликуваше на деним, но беше далеку полуксузен и поелегантен.
Ралф Лорен
Елегантни костуми со кратки пантолони, пастелни бои, минималистички свилени фустани, крзнени кратки наметки и шалови – едната половина од колекцијата на Ралф Лорен изгледаше супер слатко и нежно. А потоа, на ред дојде елегантниот гламур изразен преку долги сребрени и бели тоалети со блескави извезени материјали.
20-тите години на минатиот век очигледно биле во мислите на 71-годишниот дизајнер додека ја создавал пролетната колекција. Стилот од тој период можеше да се насети и во шапките и во костумите и во „пердувестите“ фустани и крзнените додатоци.
Рејчел Зое
Омилената стилистка на холивудските ѕвезди, Рејчел Зое, ја претстави својата колекција во Њујорк. „Мојата инспирација е навистина многу едноставна. Тоа е Брижит Бардо, на југот на Франција, во доцните 60-ти, раните 70-ти години“ – изјавила Рејчел.
Прабал Гурунг
Впечатлива, интересна, модерна и полна со смелост и нестандардност – колекцијата на Прабал Гурунг беше вистинско освежување на њујоршките модни писти.
Футуристичките принтови и модели ја разбија ретро монотонијата, а секој модел донесе секси палаво присуство.
