Три главни состојки и многу, многу ароматни варијации... овие мали колоритни топчиња ќе ја разубават вашата трпеза, ќе ги задржат погледите на сите околу неа, а вас нема ниту да ве истоштат, ниту да ве истрошат.
Се приготвуваат ултра брзо, а можете да ги обложите со најразлични зачини, сушенo овошјe, јаткасти плодови или мешавини за да добиете колорит, разновидност и да го задоволите сечиј вкус.
Состојки
| 300 гр | фета сирење |
| 300 гр | рендан кашкавал |
| 2 големи лажици | Битолска павлака |
| магдонос | |
| црвен пипер | |
| афион | |
| сушена брусница | |
| ореви |
Подготовка
- Во длабок сад измешајте ги сирењето, кашкавалот и павлаката.
- Откако ќе добиете хомогена смеса, со помош на мала лажица издвојувајте од неа и со дланките оформувајте мали топчиња. Мини топчињата редете ги во тава или рамен сад. (Од посочените состојки излегуваат околу 30 топчиња.)
- Тавата ставете ја во фрижидер барем половина час за топчињата минимално да се стврднат и да ви биде полесно да ги обложувате.
- Секое од топчињата протркалајте го во избраната состојка. Освен сецкан магдонос, црвен пипер, афион, сечкана сушена брусница и издробени ореви (што беше наш избор), можете да експериментирате и со сецкан млад кромид, печен сончоглед, семки од тиква, издробен чипс, иситнети бадеми, пржени парчиња сланина и сл. Опциите се неброени.
- Сервирајте со крекери или мали потпечени парчиња леб.
Со овој рецепт Фемина учествува во предизвикот „Медиумите готват“ на Бимилк. Битолската павлака е „омилена со секој оброк“, нели?