Почетна » Рецепти » Популарни јадења » Слатко-кисело пилешко

Слатко-кисело пилешко

Пилешко месо во слатко-кисел сос со зеленчуци, ананас и ориз

Кинеската кујна е многу интересна, затоа што често спојува различни ароми и зачини. Ако сте љубител на кинеската храна, сигурно сте пробале пилешко месо во слатко-кисел сос. Невообичаената егзотична комбинација не е прифатлива за секого, но многумина уживаат во миксот на вкусови.

Ако и вие го обожавате ова јадење или едноставно сакате да пробате нешто ново, еве како да го приготвите.

Состојки

Пилешко:

1kg	пилешки гради (без кожа и коски)
1	шолја брашно
½	шолја млеко
2	јајца
	зачини: црн пипер, ѓумбир, лук во прав (по вкус)

Зеленчуци и ананас:

1	зелена пиперка
1	црвена пиперка
1	глава кромид
2	моркова
500g	ананас (од конзерва)

Слатко-кисел сос:

½ шолја	сок од ананас (од конзервата)
¼ шолја	шеќер
¼ шолја	црвен вински оцет
3 с.л.	сок од лимон
2 с.л.	пченкарно брашно

Подготовка на пилешкото

Исечкајте го пилешкото месо на коцки (не премногу ситни).

Во длабок сад ставете ги јајцата и млекото. Матете додека не се добие хомогена смеса. Во друг плиток сад промешајте ги брашното и зачините.

Во тавче ставете околу 1cm масло. Загрејте го. Земете дел од парчињата пилешко и потопете ги во садот со јајцата и млекото. Потоа извадете ги и валкајте ги во садот со брашното. Ставете ги во загреаното масло и пржете додека не добијат златна боја. Превртувајте ги парчињата за да бидат испржени подеднакво од сите страни. Откако ќе се испржат, ставете ги во сад со хартија за да се исцеди маслото. Повторете ја постапката неколку пати, додека не го приготвите целото месо. Оставете го настрана.

Подготовка на сосот

Во мал длабок сад, промешајте го пченкарното брашно со малку вода, додека не добиете течна хомогена смеса.

Во тенџере ставете го сокот од ананас и додајте 1 шолја вода. Загрејте го на тивок оган. Полека додавајте од шеќерот, постојано мешајќи. Откако ќе се раствори шеќерот, полека додајте го винскиот оцет, па сокот од лимон, без да престанувате со мешање.

Додајте ја смесата од пченкарно брашно и вода. Продолжете постојано да мешате. Сосот ќе зоврие, па ќе почне да се згуснува. Тргнете го од огнот откако ќе ја постигнете посакуваната густина (треба да изгледа како сируп). Оставете го настрана.

Подготовка на зеленчуците и спојување на деловите

Измијте ги пиперките, извадете ги семките и исечкајте ги на квадратни парчиња од 1-2cm. Излупете го кромидот и исечкајте го на мали парчиња од 1-2cm. Исчистете ги морковите и исечкајте ги дијагонално на тенки парчиња.

Ставете малку масло во големо тавче (ако имате вок, искористете го). Загрејте го на средна температура. Додајте ги сите зеленчуци (без ананасот) во тавчето и гответе додека кромидот не добие златна боја, притоа често промешувајќи.

Додајте го претходно приготвениот сос и продолжете да мешате додека не се соедини сосот со зеленчуците.

Ако парчињата ананас се во форма на круг, исечкајте ги на коцки. Додајте ги во тавчето заедно со приготвените парчиња пилешко. Мешајте на тивок оган, додека не се затоплат.

Можете да го сервирате јадењето со ориз со кари. Добар апетит!