Ева Мендес и Рајан Гослинг ѝ посакаа добредојде на својата втора ќерка. Бременоста на убавата актерка можеби е една од најдобро криените во Холивуд, бидејќи за неа се дозна пред помалку од еден месец, кога Мендес беше фотографирана како со чанта си го покрива трудничкото стомаче.
42-годишната актерка се породила на 29 април во Санта Моника, Калифорнија, но странските медиуми ја пренесоа среќната вест откако TMZ го објави изводот од матичната книга на родените на малото бебенце. Според документот, ќерката на славните актери го доби името Амада Ли Гослинг.
Парот беше фотографиран додека се упатуваше на ручек на Денот на мајката со својата 20-месечна ќерка Есмералда Амада.
35-годишниот Рајан и Ева се запознаа на снимањето на филмот „The Place Beyond the Pines“, а ја започнаа својата врска во септември 2011 година.
