Зачекорете во волшебниот свет на Зухаир Мурад. Либанскиот дизајнер однесе луксузен блесок во Париз со својата колекција висока мода пролет/лето 2015.
Аристократски шарм изразен преку наметки и балски раскош, префинетост потенцирана преку рафинирани ткаенини кои би ги одушевиле и дамите со истенчен вкус и софистицираност претставена преку нежни пастелни нијанси се соединија во хармонична модна бајка.
Комплексните декоративни низи од кристали, бисери и мониста, деликатните апликации и цветните везови ги збогатуваа текстурите на креациите. Елегантите силуети варираа, но се задржаа во областа на класиката. Транспарентноста која дозволуваше суптилно да се ѕирне женското тело, V-изразот на деколтето или грбот и високите шлицови испраќаа сексапилни вибрации.
Мурад не внесува новитети во модата, но затоа пак без исклучок секоја сезона успева мајсторски да ја збогати модната понуда со беспрекорно гламурозни и женствени креации.
