Ако имаат можност да изберат за себе една креација од Париската недела на високата мода, повеќето жени би избрале тоалета на Ели Сааб.
Либанскиот дизајнер без многу експериментирање повторно покажа беспрекорна елеганција преку своите долги самовилски тоалети кои мамеа воздишки. Со модерни супер луксузни деликатни материјали, многу мониста, кристали и многу малку крзно, Сааб успешно донесе гламур на модната писта во Париз и скоро е сигурно дека тој гламур набрзо ќе го видиме на црвените килими во Холивуд.
Палетата на бои не беше голема. Можеа да се видат небесно сини, морнарско сини, бежови и бели креации. Секој фустан беше во препознатливиот стил на Сааб, а со таа своја постојаност тој како и секогаш успеа да добие громогласни аплаузи.
