Зелен и црн чај за помал ризик од рак на јајниците

Експертите постојано советуваат црниот и зелениот чај да се внесат во секојдневната исхрана, поради нивниот благотворен ефект врз здравјето. Сега истражувањата даваат уште една причина плус да го послушаме нивниот совет.

Зелениот и црниот чај заштитуваат од рак на јајниците.

Жените кои пијат по две чаши црн чај или една чаша зелен чај дневно, го намалуваат ризикот за заболување од рак на јајниците. Тоа е заклучокот на две одделни истражувања во оваа област.

Првото истражување било направено од Универзитетот Вашингтон со учество на 2000 жени. Тоа покажало дека жените кои пијат една или повеќе од една чаша зелен чај дневно, го намалуваат ризикот за заболување од рак на јајниците со 54%.

Во рамките на истражување во Шведска, научниците откриле дека ризикот од рак на јајниците се намалил за 50% кај жените кои пиеле најмалку 2 чаши црн чај дневно.

Со претходни истражувања докажано е дека црниот и зелениот чај помагаат за зачувување на здравјето на срцето, зголемување на активноста на мозокот и намалување на нивото на „лош“ холестерол.