Незаборавни туристички локации, атрактивни аутфити, препознатлива поза и копнеж за авантури, сето тоа е мајсторски склопено во фотографиите на Мурад Осман и стои во темелите на проектот „Follow Me To“ (Следи ме до).
Осман заедно со својата девојка Натали Захарова во 2011 година го започна популарниот фото-проект со кој стекна над 2 милиони следбеници на Instagram. На секоја фотографија, Натали е свртена со грб и нежно го влече за рака Осман, кој притоа ја фотографира.
„Првата фотографија се случи во Барселона каде бевме на одмор. Мојата девојка беше вознемирена бидејќи јас постојано фотографирав сè, па затоа ми ја зграби раката и се обиде да ме повлече напред. Но, тоа не ме спречи мене да продолжам да фотографирам. Така започна сè“ – изјавил Осман за Mashable.
Пред околу 10 месеци Осман ја запроси Натали и секако не пропушти да го одбележи среќниот момент со фотографија.
За своите последни авантури вљубениот пар избра да ја посети егзотичната Индија. Претходно, тие патуваа во Лондон, Дубаи, Хонгконг, Москва, Париз, Ница, Петра, Барселона, Милано и Рим.
