„Трипати Олимпијка, но овој пат носејќи мал Олимпиец“: Спортистка во 7-миот месец од бременоста настапи во Париз
Нада Хафез постигна успех со којшто ќе се гордее цел живот. Египетската спортистка во седмиот месец од бременоста се натпреваруваше во мечување на овогодишната Олимпијада и успеа да извојува победа во првата рунда.
За жал, нејзиното учество на Олимпијадата заврши по поразот од претставничката на Јужна Кореја.
Нада ја откри убавата вест дека е во блажена состојба преку објава на социјалните мрежи. Таа сподели две фотографии и во описот напиша:
Олимпијка во седмиот месец од бременоста!
Она што изгледаше како две натпреварувачки на подиумот, всушност беа три. Бевме јас, мојата противничка и моето бебенце кое треба да дојде на овој свет! Моето бебе и јас имавме многу предизвици, физички и емоционални. Ролеркостерот на бременоста е тежок сам по себе, но да треба да се бориш за да одржиш баланс помеѓу животот и спортот беше многу напорно, но сепак вредеше. Го пишувам овој пост за да кажам дека сум многу горда што го обезбедив моето место во осминафиналето.
Среќна сум што ја имав довербата и поддршката од мојот сопруг и семејството за да можам да стигнам дотука.
Оваа Олимпијада беше различна: Трипати Олимпијка, но овој пат носејќи мал Олимпиец!
Нада се омажи во 2023 година, а набрзо ќе го добие најубавиот подарок на животот.
Хафез се натпреваруваше на Олимпијадата во Токио во 2021 година и во Рио де Жанеиро во 2016 година.
