Гимнастичарка руши стереотипи за Дауновиот синдром, а сега сигурно чекори во светот на модата
Гимнастичарка со Даунов синдром ги руши бариерите поставени пред неа и им докажува на луѓето дека ништо не е невозможно.
Челзи Вернер е родена со Даунов синдром и не можела да оди речиси до 2-годишна возраст. Докторите биле категорични дека таа цел живот ќе има слаба мускулатура и дека ништо не може да се направи за да се промени тоа. Но, инспиративната девојка ги надмина и нивните најголеми очекувања и денес е успешна гимнастичарка.
„Не дозволувајте никој да ви кажува дека не можете да направите нешто“ – вели таа.
За да ѝ помогнат да си ја зајакне мускулатурата, на 4-годишна возраст родителите ја запишале Челзи на часови по гимнастика. Таа работела напорно и успеала покрај сите пречки. Досега, таа била четирипати шампионка на САД, двапати на Параолипијадата и двапати на Светско првенство.
„Многу сум среќна што ми беше пружена можност да инспирирам други лица да ги следат нивните соништа! Срушив многу бариери во текот на годините, а и вие можете да го направите тоа! Секој се соочува со предизвици во животот, но разликата е како ќе справите со тие предизвици.“
„На врвот на гимнастичкиот свет сум околу десет години. Сè уште уживам во тоа, но не ми е цел свет. Преку гимнастиката ми се отворија многу можности за работа како модел и открив дека таа работа ми се допаѓа“ – вели Челзи.
Челзи чекори во модниот свет веќе три години. Се има појавено на насловната страница на Teen Vogue, има чекорено двапати на пистата за време на Њујоршката модна недела и патува за да снима кампањи за познати модни брендови.
Нејзиниот пат кон успехот не бил лесен, но таа никогаш не се откажала.
„Мислам дека за сите модели е тешко да се пробијат во модната индустрија. Јас се соочив со многу предизвици во мојот живот, но никогаш не се откажав. Има многу луѓе кои навиваат за мене и имам одличен тим.“
„Јас сум многу позитивна личност и за мене не постојат нешта како ограничувања. Многу сум тврдоглава и трудољубива. Поради начинот на кој моите родители ме воспитуваа, јас се чувствувам добро со себеси.“
„Отсекогаш сум сакала да бидам пред камера. Кога и да има камера или публика пред мене, јас се прикажувам во најдобро светло. Исто така, обожавам да патувам. Мојот прв ангажман како модел беше за H&M и снимавме во Хавана, Куба.“
„Ако можам да му дадам некому надеж, тоа многу би ме усреќило и би ме направило горда“ – вели таа.
