Брижит Макрон застана под лупата на светската јавност откако нејзиниот сопруг Емануел се кандидира за претседател на Франција и победи на изборите.
Нивната љубовна приказна е мета на многу критики поради 24-годишната разлика во возраста, но и заради тоа што љубовта се родила додека таа била мажена, а тој бил нејзин малолетен ученик.
64-годишната прва дама во интервју за „Elle“ изјави: „Единствената маана на Емануел е што е помлад од мене. Кога читам за нашата врска, секогаш се чувствувам како да читам туѓа сторија. Нашата приказна е многу едноставна.“
Брижит и Емануел се запознале кога таа му била наставничка и менторка за училишна претстава. Таа имала 40 години и била мажена со три деца, а тој имал 15 години.
Уште тогаш започнала да се развива привлечност помеѓу нив, но Брижит тврди дека не ја започнале врската во тој период. „Пишувавме заедно петок навечер, а веќе од сабота чекав да дојде следниот петок. Не разбирав зошто. Сето тоа ми изгледаше лудо“ - раскажала таа.
На прашањето дали се обидела да се оттргне од Емануел, таа одговорила: „Да, моја беше идејата Емануел да го продолжи образованието во Париз, затоа што сметав дека тоа е најдобро за него. Во тој момент немаше ништо меѓу нас, иако гласините се ширеа. Се грижев само за моите три деца, Себастијан, Лоренс и Тифани. За никој друг.“
„Што се однесува на разликата од 20 години, што и да може да се каже за тоа, е многу тривијално. Се разбира, за време на појадок јас сум таму со моите брчки, а тој со неговата младост. Едноставно така е“ - додала таа.
За разделбата од нејзиниот сопруг за да биде со Емануел, Брижит вели: „Разделбите секогаш прават штета. Децата најчесто страдаат. Знам дека ги повредив моите деца и за тоа најмногу чувствувам вина. Но, има моменти во животот кога мора да донесеш витални одлуки. Тоа беше мојата. Ако не го направев тој избор, ќе пропуштев многу во животот.“
Брижит изјавила и дека не сака да биде нарекувана прва дама. „Не се чувствувам како Прва дама. Не се чувствувам ниту како прва, ниту како последна, ниту како дама. Јас сум Брижит Макрон.“
