Диетата „Зона“

Диетата „Зона“

Публикуван за прв пат во 1995г., режимот за хранење „Зоната“ е создаден од биохемичарот Бери Сирс. Според него тоа не е диета, туку начин на живот кој што треба да се практикува постојано.

Овој начин на исхрана се применува од многу популарни личности како Џенифер Анистон, Синди Крафорд, Чарли Шин, Том Круз. Најдебелиот човек на светот Мануел Урибе ослабе повеќе од 200 килограми благодарение на оваа диета.

Диетата Зона
Диетата Зона е како слагалица - 40% од калориите треба да се јаглехидрати, 30% масти и 30% протеини.

Како дејствува?

Теоријата на која се потпира „Зоната“ е следната: Инсулинот, хормонот што го регулира нивото на шеќер во крвта, е виновникот за дебелината. Со регулирање на нивото на шеќер во крвта и одржување на инсулинот „во зоната“, телото согорува масти поефикасно и затоа се губат килограмите (од 0,5-1,5kg неделно).

За успешно да се контролира нивото на шеќер, според Зоната, потребно е да се одржува перфектната рамнотежа меѓу јаглехидратите, протеините и мастите што ги внесуваме со секое хранење.

Што вклучува диетата?

Теоријата можеби делува просто, но на практика е многу покомплицирано. За да влезете во зоната, 40% од калориите на секој оброк треба да бидат јаглехидрати, 30% протеини и 30% масти. Оваа комбинација се применува при секое хранење, т.е. не можете за појадок да јадете само јаглехидрати, а за ручек протеини и масти.

За да бидете „во зоната“, првиот оброк треба да го јадете не покасно од 1 час откако ќе се разбудите, помеѓу оброците не треба да изминат повеќе од 5 часа и последниот оброк во денот да ви биде минимум 2 часа пред спиење.

Д-р Сирс ја распределува храната во блокови, така што на секој блок масти да му одговараат 1 блок протеини и 1 блок јаглехидрати.

Пример

1 блок јаглехидрати: 1 чаша зеленчуци приготвени на пареа или половина јаболко или половина портокал.

1 блок масти: 1 чајна лажичка маслиново масло.

1 блок протеини: 2 белки од јајце или 30g месо или риба или 50g изварка.

Ако изедете 60g месо (2 блока протеини), тоа треба да го урамнотежите со 2 чаши зеленчуци на пареа и 2 лажички маслиново масло.

Различни типови храна
„Зоната“ ја разделува храната на блокови.

Колку блока треба да консумирате дневно зависи од вашата тежина, висина и обиколката на колковите и струкот. Колку е поголема вашата тежина, толку повеќе блокови ви се дозволени.

Целиот овој процес на создавање на правилни оброци е толку сложен што многу брзо луѓето се откажуваат од оваа диета. Со цел сето тоа да биде поедноставно д-р Сирс препорачува за секој оброк чинијата да ја разделуваме на 3 еднакви дела.

Во едната третина да ставиме нискомаслени протеини како едно парче пилешко, кое да не биде поголемо или потенко од дланката на раката. Останатите две третини пополнете ги со овошје и зеленчук. Тоа се јаглехидратите. На крајот додајте 1 чајна лажичка маслиново масло, за да имате комплетен оброк кој што одговара на формулата 40:30:30.

Основни храни кои што се извор на протеини и се препорачуваат се: пилешко без кожа, мисиркино месо, риба, нискомаслено млеко, варени јајца.

За да си ги обезбедите потребните калории од јаглехидрати, консумирајте секакви зеленчуци (освен моркови и пченка) и секакви овошни плодови (освен банани). Можете да си дозволите и мали количини на леб, макарони и ориз.

Извор на масти во вашата исхрана можат да бидат: авокадото, бадемите, маслото за јадење и рибиното масло.

Анкета

Анкета
Каде планирате да одите на одмор летово?
  • 39%
  • 16%
  • 25%
  • 20%
Се испраќа...

(Вкупно: 3779 гласа)

Цитат

Некои од најдобрите спомени се создадени во апостолки.

Кели Елмор

Виц

Крем со колкав фактор?

- Со 20.

Доволно ќе ви е?

- Ако згрешам, нека изгорам.