Холивудските ѕвезди неретко добиваат критики и коментари за нивниот изглед на кои не можат да реагираат рамнодушно.
Сара Џесика Паркер не остана имуна на таквите коментари, па одлучи да го искаже својот став во интервју за „Вог“.
56-годишната актерка моментално го снима продолжението на серијата „Sex and the City“ во кое таа заедно со дел од останатите актери не ја сокриваат седата коса и брчките.
За модната библија, Паркер изјави: „Постојат толку мизогинистички коментари за нас, кои никогаш нема да бидат кажани за мажите. Седа коса, седа коса, седа коса. ‘Дали таа има седа коса?’ Седам покрај Енди Коен и тој има седа коса и е извонреден. Зошто е во ред за него? Не знам што да ви кажам луѓе. Особено на социјалните мрежи. Секој има нешто да каже. ‘Таа има многу брчки, таа нема доволно брчки’“.
„Речиси чувствувам како луѓето да не сакаат ние да се прифаќаме онакви какви што сме, како да уживаат во тоа да ни задаваат болка за тоа што сме денес, дали ќе одлучиме да старееме природно и да не изгледаме совршено. Знам како изгледам. Немам избор. Што да направам во врска со тоа? Да престанам да стареам? Да изчезнам?“ – додаде славната актерка.
Модни куќи како Долче и Габана, Валентино, Шанел, Фенди и Александар МекКвин позајмија креации за фотосесијата на Сара Џесика за „Вог“.
