Додека ние се подготвуваме за ладната сезона со најтопла облека, во бутиците на славните дизајнери пристигнуваат ресорт колекциите, наменети за богатите клиенти кои обожаваат да патуваат на егзотични и топли дестинации во текот на зимските денови.
Ели Сааб пред една недела го објави рекламното видео за колекцијата ресорт 2013, со кое го одбележа пристигнувањето на неговите актуелни креации во луксузните бутици.
Како и секогаш, неговата колекција ги плени женските погледи. Либанскиот дизајнер овојпат вклучи дневни бизнис и романтични вечерни креации. Кратки широки панталони од црно-бел твид, сукњи тип „молив“, тесни пеплум фустани со должина до колената и долги елегантни тоалети во црна, светло сива, јаболкова зелена, орхидеја розова и костенливо кафеава боја освојуваат на прв поглед. Софистицираните модни додатоци, пак, одлично ги надополнуваат примамливите креации.
